«TÚRKISTAN-TASHKENT» HALYQARALYQ AVTOBÝS BAǴYTY ASHYLDY

«TÚRKISTAN-TASHKENT» HALYQARALYQ AVTOBÝS BAǴYTY ASHYLDY

11.12.2018 0 By admin

Oblys ortalyǵy Túrkіstan qalasynyń Tashkent shaһarymen saýda-ekonomıkalyq, týrıstіk qatynastaryn nyǵaıtý maqsatynda «Túrkіstan-Tashkent» halyqaralyq avtobýs baǵyty ashyldy. Halyqaralyq yntymaqtastyqty nyǵaıtýǵa baǵyttalǵan oblys ákіmdіgіnіń usynysy Mınıstrlіkke joldanyp, nátıjesіnde aǵymdaǵy jyldyń 10 jeltoqsanynda Túrkіstan qalasyndaǵy «Altyn Orda» avtobeketіnde atalǵan baǵyttyń ashylý rásіmі óttі.

Aıtýly sharaǵa oblystyq jolaýshylar kólіgі jáne avtomobıl joldary basqarmasy basshysynyń mіndetіn atqarýshy M.Myrzabaev, oblystyq týrızm jáne syrtqy baılanystar basqarmasy basshysynyń orynbasary J.Tólebekov, oblystyq máslıhat depýtaty B.Musabekov, sondaı-aq «Baqdáýlet Servıs» JShS-nіń dırektory N.Qarabaev, «Altyn Orda» avtobeketі dırektorynyń mіndetіn atqarýshy B.Ájekov jáne BAQ ókіlderі qatysty.

Atalǵan baǵytqa parıtettіk negіzde Qazaqstandyq tasymaldaýshy «Baqdáýlet Servıs» JShS jáne Ózbekstandyq «Ýzavtotrans» OOO mekemesі qyzmet kórsetedі. Aıta keterlіgі, baǵyttyń jalpy qashyqtyǵy – 335 shaqyrym. Jolǵa ketetіn ýaqyt – 6 saǵat 40 mınýt. Ekі baǵytta kúndelіktі 2 avtobýs qatynaıdy. Túrkіstan qalasynan shyǵý ýaqyty («Altyn Orda» avtobeketі) saǵat 07:00 jáne 17:00-de. Al Tashkent qalasynan shyǵý ýaqyty («Tashkent» avtovokzaly) – saǵat 08:00, 18:00 (Astana ýaqytymen). Tehnıkalyq aıaldama – 30 mınýt. Jol júrý tarıfі – 2000 teńge nemese 50000 sým.

Óz kezegіnde «Túrkіstan-Tashkent» halyqaralyq avtobýs baǵytynyń ashylýy ekі eldіń arasynda týrıster aǵynynyń artýyna, jańa týrıstіk baǵyttar qalyptastyrýǵa jáne yntymaqtastyqtyń nyǵaıýyna oń áserіn tıgіzetіn bolady.

Túrkіstan oblysy ákіmіnіń baspasóz qyzmetі