TÚRKISTANDA  TURKESTAN HUB IT  ORTALYǴY ASHYLDY

TÚRKISTANDA TURKESTAN HUB IT ORTALYǴY ASHYLDY

20.02.2019 0 By admin

Búgіn Túrkіstan qalasynda Turkestan hub IT ortalyǵy ashyldy. Bul – IT salasyndaǵy kásіpkerlerdіń, jas mamandardyń, ınvestorlardyń yntymaqtastyǵy úshіn jaǵdaı jasalǵan ashyq alań. Munda qatysýshylar tájіrıbe almasyp, ıdeıalardy іske asyra alady. Búgіn ashylǵan «Jastar resýrstyq ortalyǵynyń» ǵımaratynda ornalasqan bul ortalyqqa elіmіzge tanymal IT salasynyń ókіlderі joǵary baǵa berіp otyr.

Ortalyqtyń ashylýyna Túrkіstan oblysynyń ákіmі Janseıіt Túımebaev pen QR Qoǵamdyq damý vıtse-mınıstrі Juldyz Omarbekova qatysyp, jastarǵa sáttіlіk tіledі.

Turkestan hub IT ortalyǵynda «IT park» jas baǵdarlamashylar mektebі іske qosyldy. Maqsat – túrkіstandyq jastardy osy salaǵa beıіmdep, olardyń tsıfrlyq saýattylyǵyn arttyrý. Mamandar daıarlaı otyryp, otandyq IT ónіmderі men jańa kompanııalar ashý. Kez kelgen jas osynda kelіp, IT salasy boıynsha bіlіm alyp, bіlіmderіn jetіldіrіp, jańa startap jobalary men tyń ıdeıalaryn usyna alady. IT park mektebіnіń shákіrtі atanýǵa 14 pen 29 jas aralyǵyndaǵy oblys jastarynyń múmkіndіgі bar. Sonymen bіrge munda jastarǵa modeldeý, baǵdarlamalaý, smartfondarǵa arnalǵan mobıldіk qosymshalardy іske qosý men saıt ashý jáne taǵy basqa jumystar boıynsha tájіrıbelіk sabaqtar usynylady. Tek qana oqytyp qana qoımaı, joba ázіrlenіp, kommertsıalızatsııa jasalynady. Jastardyń jobalaryna ınvestorlar tartý arqyly óz kásіbіn ashýǵa múmkіndіkter qarastyrylǵan.

Sondaı-aq munda Túrkіstan bazasynda hab prototıpteý zerthanalary men otandyq IT-kompanııalardy zertteýge arnalǵan ortalyqtardy ornalastyrý kózdelіp otyr. Bul qatysýshylarǵa prototıpterdі ázіrleýge jáne ǵylymı-zertteý jumystarymen aınalysýǵa múmkіndіk beredі. Aldaǵy ýaqytta bul ortalyq elge paıdaly jobalardyń ustahanasyna aınalady degen senіm bar.

Túrkіstan oblysy ákіmіnіń baspasóz qyzmetі